Ymunwch â ni fel Aelod
Rydym yn chwilio am unigolion annibynnol sy’n gallu helpu i ddiogelu un o sefydliadau gwasanaethau cyhoeddus pwysicaf Cymru, cyfrannu at stiwardiaeth Glas Cymru a helpu i sicrhau bod buddiannau hirdymor cwsmeriaid, cymunedau a chenedlaethau'r dyfodol yn parhau i fod wrth wraidd y broses o wneud penderfyniadau.
Mae Dŵr Cymru yn sefydliad nid-er-elw ac yn unigryw yn y sector cyfleustodau. Mae ein rhiant-gwmni, Glas Cymru Holdings Cyfyngedig, yn gwmni a ffurfiwyd ar gyfer perchnogi, ariannu a rheoli Dŵr Cymru.
Nid oes gennym gyfranddalwyr, yn hytrach mae gennym tua 60 o Aelodau annibynnol sy'n cyflawni rôl graffu a llywodraethu hanfodol.
Mae unrhyw warged ariannol yn cael ei gadw er budd ein cwsmeriaid a'i roi yn ôl er mwyn gofalu am eich dŵr a'r amgylchedd.
Mae Dŵr Cymru yn dechrau cyfnod o her a chyfle sylweddol wrth i ni barhau i gydbwyso fforddiadwyedd, gwelliant amgylcheddol, cyfrifoldebau iechyd y cyhoedd a gwydnwch hirdymor.
Fel Aelod, gallwch gyfrannu at stiwardiaeth un o sefydliadau gwasanaethau cyhoeddus pwysicaf Cymru a helpu i sicrhau bod penderfyniadau’r dyfodol yn adlewyrchu buddiannau hirdymor cwsmeriaid, cymunedau a chenedlaethau'r dyfodol.
Fel Aelod, byddwch yn...
- Helpu i sicrhau safonau uchel o lywodraethiant corfforaethol
- Cwrdd o leiaf ddwywaith y flwyddyn (gan gynnwys ein Cyfarfod Cyffredinol Blynyddol) a chyfarfodydd rhanbarthol a gynhelir yn y Gwanwyn a'r Hydref ledled y rhannau o Gymru a Lloegr yr ydym yn eu gwasanaethu
- Darparu her a chraffu annibynnol drwy ddwyn ein Bwrdd Cyfarwyddwyr i gyfrif am berfformiad y cwmni
- Gweithredu fel stiward model Glas Cymru
- Dod â safbwyntiau cwsmeriaid, cymunedol a chymdeithasol i drafodaethau llywodraethiant
- Cyfrannu at lwyddiant hirdymor y sefydliad
Nid yw aelodau’n cael eu penodi i gynrychioli sefydliadau, sectorau, buddiannau gwleidyddol na grwpiau ymgyrchu. Er bod yr Aelodau’n dod â safbwyntiau gwerthfawr o'u cefndiroedd a'u profiadau, maent yn gweithredu'n annibynnol ac er budd Glas Cymru yn ei gyfanrwydd.
- Mae'r rôl yn ddi-dâl – ond byddwch yn cael arian yn ôl am dreuliau
- Byddwch yn helpu i lunio llywodraethiant un o gwmnïau mwyaf Cymru
- Y cyfle i helpu i oruchwylio gwaith un o'n gwasanaethau cyhoeddus mwyaf hanfodol
- Y cyfle i wneud cysylltiadau ag Aelodau eraill a chael datblygiad personol a mewnwelediad i'r diwydiant dŵr
Er mwyn adlewyrchu'r cymunedau rydym yn eu gwasanaethu ledled Cymru a rhannau o Loegr, rydym yn awyddus i benodi Aelodau ag ystod amrywiol o oedrannau, sgiliau, cefndiroedd a phrofiadau.
Nid oes angen profiad arnoch yn y diwydiant dŵr. Rydym yn chwilio am bobl sydd â barn gadarn, annibyniaeth, chwilfrydedd a pharodrwydd i gyfrannu'n adeiladol. Gall safbwyntiau gwerthfawr ddod o arbenigedd proffesiynol, cyfranogiad cymunedol, gwaith gwirfoddol, profiad arweinyddiaeth neu brofiad byw.
Mae'r aelodau'n stiwardiaid annibynnol ar fodel nid-er-elw unigryw Glas Cymru. Maent yn diogelu buddiannau hirdymor y cwmni, yn penodi ac yn diswyddo Cyfarwyddwyr Anweithredol ac yn helpu i sicrhau bod y Bwrdd yn parhau i fod yn atebol am gyflawni ar gyfer cwsmeriaid a chymunedau.
Rydym yn arbennig o awyddus i glywed gan ymgeiswyr o rannau o'n hardal gyflenwi sydd wedi'u tangynrychioli ar hyn o bryd, gan gynnwys Gogledd Cymru, Cymoedd De Cymru, Henffordd a Chaer.
Cyfweliadau a Dyddiadau Allweddol
Bydd ymgeiswyr ar y rhestr fer yn cael eu gwahodd i gyfweliad wyneb yn wyneb ddydd Mawrth 20 neu ddydd Mercher 21 Hydref. Bydd lleoliad y cyfweliadau yn cael ei bennu gan nifer y ceisiadau a dderbynnir o'r ardal honno.
Gwneir yr penodiadau tua diwedd mis Hydref a chynhelir diwrnod sefydlu ddydd Gwener 20 Tachwedd cyn i chi gael eich gwahodd i'ch cyfarfod Aelodau cyntaf, ddydd Iau 3 Rhagfyr.
Dyma beth sydd gan ein haelodau presennol i'w ddweud am y rôl:
Heledd Jones
"Mae'n gyfle diddorol iawn i chwarae rhan fach mewn dylanwadu ar sefydliad hynod bwysig yng Nghymru, tra’n datblygu eich hun. Mae wedi bod yn anhygoel gweld rhywfaint o'r gwaith sy'n digwydd y tu ôl i'r llenni, mae Dŵr Cymru yn enfawr - o'r holl waith peirianneg, wedi'i gynllunio (ac heb ei gynllunio!), i wella ansawdd dŵr i reoli nifer fawr o randdeiliaid ar draws Llywodraethau, rheoleiddwyr a'r cyfryngau.
“Mae’r Bwrdd a’r Tîm yn agored iawn ac yn hawdd mynd atynt ac yn croesawu’r Aelodau’n. Bonws annisgwyl yw cwrdd â'r Aelodau eraill - mae dros 60 ohonom o drawstoriad eang o gymdeithas, felly rydw i wedi cwrdd â phobl na fyddwn i'n cwrdd â nhw fel arfer o fewn fy nghylchoedd arferol!"
Oliviah Rix-Taylor
"Mae bod yn Aelod wedi bod yn brofiad amhrisiadwy. Mae hi wedi rhoi darlun gonest a diffuant i mi o’r sialensiau unigryw sy’n wynebu’r sector dŵr. Fel un sy’n dod o gefndir amgylcheddol a’r sector cyhoeddus, un o’r pethau mwyaf difyr am fod yn Aelod yw helpu i graffu ar waith Dŵr Cymru a meddwl am ei ddyfodol mewn ffordd strategol. Rydw i’n dod allan o gyfarfodydd bob tro yn teimlo fy mod i wedi cael fy ysbrydoli gan y bobl sy’n gweithio dros Dŵr Cymru. Rydw i wedi bod ar deithiau i ymweld â chronfeydd dŵr, wedi dysgu beth sy’n digwydd i ddŵr a dŵr gwastraff mewn amryw o gyfleusterau trin, wedi cwrdd â’r peirianwyr sy’n gweithio ar argaeau, ac wedi gwneud ffrindiau da ar hyd y ffordd. Mae cael cyfrannu at lywodraethiant sefydliad sy’n chwarae rhan mor bwysig ym mywydau pob dydd pobl ar draws Cymru’n rhywbeth sy’n rhoi boddhad aruthrol i mi."
Ananya Ghosh
"Fel aelod, rwy’n teimlo balchder mawr o gyfrannu at sefydliad sy’n chwarae rhan mor bwysig mewn bywyd pob dydd. Mae yna ymdeimlad clir o bwrpas wrth ddarparu gwasanaethau hanfodol, amddiffyn yr amgylchedd a chynorthwyo cymunedau ledled Cymru, oll ar sail dull nid-er-elw unigryw o weithio."
Pin-Nee Tang
"Mae bod yn Aelod wedi bod yn brofiad hynod werth chweil y byddwn i’n ei argymell i unrhyw un sydd am wneud gwahaniaeth cadarnhaol. Wrth galon Dŵr Cymru mae yna set o werthoedd sydd heb eu hail, sy’n gyrru ymrwymiad y cwmni i gyflawni’r deilliannau gorau posibl ar gyfer cwsmeriaid, cymunedau a’r amgylchedd, er gwaetha’r sialensiau cymhleth sy’n ei wynebu. Gallwch helpu’r busnes i gysylltu â’i gwsmeriaid a’r cymunedau y mae’n eu gwasanaethu, ei herio’n adeiladol, a’i gynorthwyo i ddod yn arweinydd yn y diwydiant dŵr. Ar hyd y ffordd, cewch ennill profiadau gwerthfawr a chyfleoedd ar gyfer twf personol."
Ymgeisiwch
yma
I wneud cais, anfonwch eich CV a llythyr eglurhaol yn esbonio pam yr hoffech ddod yn Aelod o Glas i company.secretary@dwrcymru.com erbyn dydd Iau 8 Hydref.
Cwblhewch a dychwelwch gyda’ch cais y Ffurflen Cyfle Cyfartal atodedig a fydd yn cael ei defnyddio at bwrpas monitro yn unig.
